كلنا عدينا بأيام محددة بنرجع فيها بعد يوم طويل مرهقين وعاوزين ننام على طول، أو بنصحي متأخر ومستعجلين وبنقرر نفوت خطوة الغسول..خصوصاً إننا غسلنا وشنا بالصابون خلاص.
لو دا حصل بين وقت للتاني مفيش فيه مشكلة، لكن مهم تعرفي إن الغسول مش خطوة تكميلية، لو فوتي استعماله كل يوم بشرتك هتتأثر جدا، بنتكلم هنا عن إنك هتتفاجئي ببشرة متهيجة، وحبوب شباب وجفاف.
كتير مننا لما بيبص للبشرة المجهدة بنفكر على طول ازاي نعالج المشاكل دي، عقلنا تلقائيا بيروح لمنتجات غالية وكتيرة تساعد في حل مشاكل البشرة، مع إن الحل الحقيقي هو إننا نرجع لأبسط خطوة في روتين البشرة اللي كلنا بننساها، الغسول.
ليه مهم تستعملي غسول للبشرة؟
فكري في كم الحجات اللي بشرتك بتتعرض ليها كل يوم. من اول المكياج للأتربة للميكروبات اللي في الجو. استعمال الغسول بشكل يومي بيخلص بشرتك من كل الأتربة، ودهون البشرة الزائدة والخلايا الميتة.
ودا يجيبنا للنقطة المهمة.. ايه اللي هيحصل لبشرتك لوسبتيها تتعرض لكل دا يوم بعد يوم من غير حماية؟
ايه اللي هيحصل لبشرتك لو ماستعملتيش الغسول؟
1 بشرتك هتكون جافة بشكل أكبر:
استعمال الغسول بانتظام بيلعب دور كبير في إنه يساعد البشرة تحتفظ بترطيبها. لأن الغسول بيساعد في التحكم في درجة حموضة البشرة والحفاظ عليها في المستوى المعتدل، ودا بيخليه يقدر يحجز أي مرطبات أو مياه بداخل طبقاتها. عشان كدا بتلاحظي إن بشرتك بقت جافة أكتر وخشنة لما بتوقفي الغسول.
2_ حب شباب أكتر
غدد البشرة بتنتج دهون بتغلف الطبقة الخارجية عشان تحمي الجسم من البكتيريا والأتربة، في حالة عدم استخدام غسول البشرة، بيحصل تراكم للأتربة والميكروبات، دا بيسد مسام البشرة ويمنع الدهون من إنها توصل للسطح. نقص الزيوت دا بيخلي البشرة عرضة للتلوث البكتيري، ودا بيسبب ظهور حب الشباب، والرؤوس السوداء، بثور، وبيسبب كمان التهاب مستمر للبشرة.
استعمال غسول مناسب بينقي مسام البشرة من الشوائب، ويمنع تراكم الأتربة، وبالتالي هتتفادي كل المشاكل دي.
3_ تأثير الدومينو
بشرتك شبه بيتك، ممكن يتراكم على سطحها اثار اليوم من أتربة وملوثات وبكتريا رخلايا ميتة. كل المواد دي هتكون طبقة خشنة فوق سطح جلدك تمنعه يجدد خلاياه. غير انه بيسد المسام، ويخلق بشرة جافة ومتهيجة وحكة وحب شباب وتشققات تزود أثر العدوى. أو الظاهرة المعروفة بتأثير الدومينو
ليه تعرضي نفسك لأضرار كبيرة محتاجة تكلفة خرافية لمعالجتها، لما ممكن تتجنبي كل دا بخطوة بسيطة زي الروتين؟
4_ روتينك كله هيتأثر.
ناس كتير يتشوف إن الغسول خطوة ثانوية في الروتين، لأنه مش بيشتغل على علاج أي مشكلة لأن مهمته إنه ينضف البشرة. لكن الحقيقة إن طبقة الخلايا المتراكمة نتيجة عدم استعمال الغسول، بتكون مع الوقت حاجز سميك. يغلف البشرة، ويمنع امتصاصها لأي مواد تانية. أي منتج مابتقدريش تستغني عنه لبشرتك مش هيكون ليه نتيجة، مش هيوصل لبشرتك اصلا.
ازاي اختار الغسول حسب نوع البشرة؟
- مهم تعرفي نوع بشرتك كويس عشان تقدري تختاري غسول مناسب. لو بشرتك جافة محتاجة تتجنبي الغسولات اللي بتحتوي نسبة كحول في مكوناتها، لو، بشرتك دهنية محتاجة غسول بدرجة حموضة منخفضة، ولو بشرتك حساسة هتحتاجي غسول له أساس مائي وخالي من المواد العطرية.
- لو بتتمرني، وبتعرقي كتير، دوري على غسول مخصص للمسام المسدودة
- لو بشرتك بتميل لتطوير حساسية فدوري على غسول متعادل مكوناته كلها تكون طبيعية
- لو بشرتك ميالة لتطوير الحبوب، الغسول اللي بيحتوي حمض الساليسيليك هو الغسول المناسب ليكي لأنه هيشيل الزيوت الزايدة من البشرة من غير ما يتسبب في جفافها.
ليه غسول مش صابون؟
لاحظي قبل كدا إن لما بتشوفي بشرة بعض البنات منورة وبتلمع، عقلك تلقائيا بيروح لإنك تسألي عن المنتجات اللي بيستعملوها؟ في حين إن الاجابة الحقيقية مش في المنتجات، لكن في توازن البشرة.
البشرة الصحية بتكون مرتبطة بتوازن درجة حامضيتها وقاعديتها، البشرة بطبيعتها بتكون حامضية، وعشان توصلي لبشرة نضرة ، لازم تحقيي التوازن.
ازاي؟ بإنك تعادليها بدرجة قلوية تحقق التوازن.
لو استخدمتي حاجة قاعدية بشكل ازيد من اللازم، هتخلي الوش جاف
لو حاجة حامضية هتخلي البشرة ملتهبة.
الصايون درجة قاعديته 10 ،وهي درجة عالية جدا، ممكن تخليكي تحسي إن بشرتك نضيفة، لكن هتبقى جافة جدا لأن الصابون بيجرد بشرتك من زيوتها الطبيعية. دا هيخلق سلسلة من المشاكل، من أول تقشير البشرة للالتهاب. ممكن كمان يخلي الغدد الدهنية تفرز كمية مفرطة من الزيوت عشان تعوض النقص، ودا يسد المسام ويتسبب في ظهور الحبوب والتجاعيد والخطوط البيضا.
ازاي استعمل الغسول؟
صحيح ان خطوة الغسول سهلة وبسيطة مش محتاجة مجهود، لكن كتير من الناس بتعمل اخطاء عفوية وبسيطة تماما كفيلة انها تبوظ الجهد اللي بتعمليه وتخلي بشرتك كأنها مغسولة بالصابونة، في أمريكا مثلا ظهرت احصائية إن تمانية في المية من الناس بيستعملوا الغسول بطريقة غلط..
هنا جمعنا ليكي مجموعة نصايح لازاي تستعملي الغسول
1_ اغسلي ايدك قبل استعمال الغسول عشان ماتنقليش البكتيريا لبشرة وشك.
2_ بللي وشك بالمياه قبل وضعا لغسول
3_ متستعمليش فوطة خشنة لتنشيف وشك، ودلكي الغسول في حركات دائرية كأنك بتعملي لبشرتك مساج.
4_ اغسلي وشك بمياه فاترة مش سخنة لأن المياه السخنة بتجرد بشرتك من زيوتها الأساسية.