البشرة الحساسة: حلول بسيطة لبشرة معقدة
التعامل مع البشرة الحساسة بالظبط شبه المشي جوة حقل ألغام. مهما كان روتينك، بشرتك طول الوقت متعصبة، أي حاجة هتعمليها، أي مواد ملطفة هتقرري تصالحي بشرتك بيها هتفرقع في وشك على طول، يا إما في شكل التهاب أو احمرار أو حتى حبوب بتظهر من غير سبب..
سواء كنتي بتمري بتغيير المواسم أو بتعاني من مشاكل في الشغل، بشرتك دايماً هتستجيب للمؤثرات الخارجية، تعملي ايه معاها؟ تعتني بيها وللا تسيبيها في حالها؟ ولو اعتنيتي بيها، تعملي دا ازاي من غير ما تكوني بتعرضيها لمزيد من الحساسية؟
ايه هي البشرة الحساسة؟
في البداية لازم تفهمي ان حساسية البشرة مش نوع بشرة قائم بذاته. لكن متلازمة بتصيب البشرة بكل انواعها .. كاستجابة لمحفز ما، سواء رد فعل تححسسي للبيئة أو لمنتجات بعينها أو حتى نتيجة التوتر.
إيه بيسبب حساسية البشرة؟
البشرة عندها حاجز وقاية طبيعي بيحميها من ملوثات الجو و البكتيريا، لكن نتيجة لعوامل مختلفة، بيحصل ان الحاجز دا يتأثر وفعاليته تقل، وقتها البشرة بتفقد جزء كبير من ترطيبها، وبتكون عرضة لهجوم الفيروسات والبكتريا في الجو. دا بيتم ترجمته في صورة التهاب وظهور علامات الحساسية، زي الحكة أو إحساس بالالتهاب والحرقان، سخونة البشرة أو تورمها وتقشرها.
تحسس البشرة بيحصل بسبب التهاب النهايات العصبية اللي في الطبقة الخارجية من البشرة، نتيجة ضعف الحاجز الوقائي للبشرة واللي بتقل فعاليته نتيجة:
- التعرض للشمس
- تلوث الهواء
- تغيير درجة الحرارة
- تغيير الفصول
- التعرض للماء العسر: الذي يحتوي على معادن مهيجة للبشرة
- التوتر
- استعمال الصابون
- المنتجات العطرية
إيه هي علامات البشرة الحساسة؟
البشرة الحاسة بيكون لها رد فعل أكبر من أي نوع بشرة تاني تجاه كل حاجة. هي بشرة حرفيا بتتحكم فيكي، تلبسي ايه؟ تستعملي ايه ، تخرجي في الشمس وللا تفضلي البيت.
دا معناه إنها ممكن تطور رد فعل تحسسي لحجات في العادي مش مضرة، رد الفعل دا يشمل:
1- 1. عندك بشرة تفاعلية: لو بشرتك حساسة فغالبا لاحظتي إن الصابون والمنظفات والعطور ومنتجات البشرة مؤذية ليها وبتولد حكة أو جفاف أو احمرار.
2- 2. احمرار للبشرة
يبكل أشكاله، سواء تورد في الوجنتين أو التهاب أو طفح أحمر أو حتى توسع الاوعية الدموية بشكل يخلي البشرة لونها أحمر باستمرار.
3- 3. بشرتك جافة
جفاف البشرة ممكن يقترن بحساسيتها في أوقات كتير، دا ممكن يسبب تشقق البشرة أو ظهور حب الشباب. خصوصاً في درجات الحرارة المنخفضة أو في حالة التعرض للرياح..
4- 5. بشرتك بتتعرض لحروق الشمس بسهولة
والحل؟ تلات حاجات
1- تغيير عاداتك اليومية
تغييرات بسيطة خالص في روتين حياتك ممكن يكون ليها تأثير ايجابي على بشرتك الحساسة، ابعدي عن المركبات العطرية لأنها بتسبب تهيج للبشرة، تجنبي الاستحمام بمياه ساخنة لأنها بتجرد البشرة من زيوتها الطبيعية، تجنبي المقشرات العنيفة للبشرة لأنها بترهقها، رطبي بشرتك يومياً لضمان استعادة فعالية حاجز البشرة. افتكري كويس! بشرتك أقرب لبشرة الأطفال، لازم تعامليها بحساسية.
2- تجنب المواد الكيميائية
لو بشرتك حساسة لازم تكوني اقتصادية قدر الامكان في التعامل معاها. مينفعش روتينك يكون معقد، مينفعش تعرضي بشرتك لمواد تقيلة وبيدخل في تركيبها مكونات كتير. ابعدي عن مضادات البكتيريا والكحول، والمواد العطرية.
3- روتين بسيط لبشرة معقدة
في حالة لو بشرتك حساسة، مينفعش تتعاملي معاها بمبالغة، مينفعش تعرضيها لمنتجات كتير، ومينفعش معاها روتين معقد:
- استخدمي غسول خفيف خالي من الصابون والفوم، لأن الصابون بيسبب تآكل لحاجز البشرة.
- استعملي قناع ترطيب عميق للبشرة: الترطيب بيساعد في ترميم حاجز البشرة وتهدئة الالتهابات. استخدمي مرطب بتركيبة بسيطة تكون مناسبة للبشرة الحساسة.
- السيرم أهم خطوة في روتينك: لما البشرة بتتعرض لملوثات خارجية، بتحتك بحاجز البشرة وتعرضه للأكسدة. حاجز البشرة بيرتبك كنتيجة، وبيلتهب ويسبب حساسية البشرة. اختاري سيرم يحتوي على فيتامين بي المركب، لأنه مضاد أكسدة بيعيد لحاجز البشرة توازنه، وبالتالي بيقلل الحساسية.