كلنا عارفين إن الطريق لبشرة نضرة وصحية مبني على مجموعة من العوامل، من أول الحفاظ على نظام غذائي صحي لحد استخدام منتجات عناية بالبشرة مناسبة ليكي. ومع ذلك، أوقات ممكن تنفذي كل الخطوات صح، وبرضه بشرتك ماتحققش ليكي النتيجة اللي انتي متوقعاها. او الأسوأ، تحقق نتايج عكسية، بنتكلم عن ظهور مفاجىء للحبوب، وجفاف، واحمرار، وأمراض جلدية كمان.
احنا عارفين إنك سألتي نفسك عن السبب، واحنا عندنا إجابة سؤالك.
الحقيقة إن في عامل خفي في سلطته إنه يأثر على كل روتينك، وينقذ بشرتك من كونها بشرة جافة، ملتهبة ومُعرّضة للحبوب مهما حاولتي معاها، لبشرة نضرة وصافية زي ما بتحلمي. الأس الهيدروجيني للبشرة.
إيه هو الأس الهيدروجيني للبشرة؟
الأس الهيدروجيني هو المقياس اللي بيتحدد بيه طبيعة أي مادة في الدنيا، هل هي حمضية وللا متعادلة وللا قلوية؟
كل حاجة في الدنيا ليها أس هيدروجيني، من أول الأكل اللي بناكله لحد منتجات البشرة اللي بنستعملها. وانتي مش استثناء من القاعدة دي.
عشان كدا عملوا مقياس نقدر نقيس عليه درجة حموضة أي حاجة، بيبتدي من 1 إلى 14. بشكل عام، كل المواد الحمضية ليها أس هيدروجيني أقل من رقم 7 (زي الخل والفواكه الحمضية)، وكل المواد القلوية ليها أس هيدروجيني أكبر من رقم 7 (زي الصابون والمنظفات)، وكل المواد المتعادلة بتكون عند الرقم 7
إيه هو البي إتش المثالي للبشرة؟
بطبيعة الحال، البشرة المتوازنة هي البشرة اللي ليها أس هيدروجيني من 5 _ 7. لكن اللي بيحصل إن بشرتك بتتعرض بصفة مستمرة لهجوم خارجي، سواء من التلوث وتغير درجة الحرارة، أو حتى ملامسة جلدك لمنتجات التنظيف المنزلي زي الكلور والصابون. كل حاجة بشرتك بتلامسها بتأثر في درجة حموضتها، وبتتسبب في تآكل "العباءة الحمضية".
إيه هي العباءة الحمضية؟
هي الغلاف اللي بيحمي بشرتك وجسمك كله من التعرض للعدوى.
البشرة بشكل عام متعددة المهام وبتلعب أدوار رئيسية متعددة في صحتنا العامة. أهم دور ليها هو إنها بتعتبر حاجز وقائي بين الجسم والعالم. عن طريق طبقة خفيفة بتغلف البشرة كلها، اسمها العباءة الحمضية.
وهي غلاف بيمنع نمو البكتيريا، وبيحافظ على بيئة حمضية مثالية تسمح للبكتريا الصحية على سطح الجلد بالنمو. عشان كدا درجة حموضة البشرة pH هي أحد آليات الحماية الرئيسية.
إيه اللي ممكن يحصل لبشرتك لو مبقتش متوازنة؟
العباءة الحمضية هتتعرض للتآكل.
لو بشرتك بقت قلوية، هيضطرب توازنها وتعجز عن إفراز زيوتها الطبيعية، بالتالي هتظهر عليها علامات الجفاف، والتجاعيد. غير إنها هتتسبب في تآكل للعباءة الحمضية ودا يخلي بشرتك معرضة للحبوب البكتيرية والحساسية..
لو بشرتك بقت حامضية بشكل زايد عن المطلوب، دا هيربك بشرتك وهيخليها تفقد زيوتها الطبيعية. وبالتالي هتظهر علامات الجفاف والالتهابات والحبوب.
عشان كدا مهم تعرفي ازاي تخلقي توازن لبشرتك، وبالتالي، مهم تعرفي إيه أصلا اللي بيخلق عدم توازن فيها.
ايه اللي ممكن يخلي بشرتك مش متوازنة؟
أي حاجة وكل حاجة بتلمس بشرتك، حتى مية الحنفية. حسب دراسة اتنشرت في المجلة الدولية لعلوم التجميل، ، مية الحنفية نفسها ممكن تأثر على درجة حموضة بشرتك لمدة ست ساعات.
في الست ساعات دول، بشرتك هتكون عرضة للملوثات البيئية والبكتريا اللي هتضر بيها.
1_ المواد الكيمائية
سواء كانت منظفات منزلية زي الكلور، أو مواد كيميائية بتتعرضي ليها بطبيعة شغلك، أو صابون المواعين، أو مسحوق الغسيل، أو الصابون، أو معطرات الجو، كلها مواد قلوية هتأثر على بشرتك بشكل سلبي يديكي نتايج عكس اللي بتتمنيها.
2_ التغيرات الهرمونية
3_ المنتجات غير المتوازنة
تعرفي ان غالبية منتجات العناية بالبشرة مابتكونش ليها أس هيدروجيني متوازن؟ الشامبوهات، الشاور جل، والغسولات القوية والمنتجات المضادة للبكتريا كلها ليها درجة قلوية عالية جدا.
ازاي تنقذي بشرتك من التآكل؟
سواء كانت بشرتك متضررة، أو جافة بشكل مبالغ فيه، دهنية،أو بتعاني من الحبوب. فمهم تعرفي إن موازنة بشرتك مسؤولة عن 50% من علاجها. عشان كدا جمعنا ليكي نصايح بسيطة تساعدك في إنك توازني بشرتك
1_ استعملي غسولات لطيفة بدرجة حموضة منخفضة
بشكل عام، لما نستعمل غسول لبشرتنا لازم نتأكد إن درجة حموضته منخفضة، تتراوح بين pH 4.5–7
لو استخدمنا غسولات قلوية هنعرض بشرتنا للالتهابات. ولو استخدمنا غسولات بدرجة حموضة عالية جدا، هتفقد زيوتها الطبيعية وتعاني من الجفاف.
2_ استخدمي تونر للبشرة
وظيفة التونر الرئيسية هي إعادة توازن البشرة ومعادلة أي تأثير قلوي ظهر نتيجة تعرضها للصابون والمنظفات.أفضل تونر للبشرة هو اللي درجته بتتراوح بين 5 _7.
3_ استخدمي كريمات مرطّبة وزيوت لبشرة صحية.
مع تقدّمنا في السن، بتقلّ كمية الزيوت أو اللي بتنتجها بشرتنا، ودا طبعا بيأثر على العباءة الحمضية للبشرة وقدرتها على حماية الجسم. عشان كدا لازم روتينك يكون فيه كريمات مرطّبة فعّالة وزيوت طبيعية زي زيت الجوجوبا، زيت جوز الهند، زيت الأرجان وزيت الزيتون،
متنسيش إن أفضل مرطبات هي الكريمات اللي البي اتش بتاعها من 5–7
4_ استخدمي منتجات العناية بالبشرة الغنية بالمواد المضادة للأكسدة
مضادات الأكسدة زي الفيتامينات A وC وE والشاي الأخضر مهمّة عشان تحفظ العباءة الحمضية.