• شحن مجاني للطلبات التي تزيد عن 395 جنيه مصري.
  • ضمان الرضا 100٪ أو استعادة الأموال.

سيرم فيتامين سي: ازاي تضمني لبشرتك عمر أطول




مفيش شك إنك سمعتي عن سيرم فيتامين سي، يا إما سيرته جت في الكلام مع واحدة من صاحباتك، أو قريتي عنه في مقالة أو سمعتي حد من الدكاترة بينصح بيه كمنتج سحري له نتائج إعجازية عالبشرة.


ايه هو السيرم؟ وايه فايدته؟ استخدمه امتى؟ وازاي؟ احنا قرينا كل الأسئلة اللي في بالك عنه، وجمعنا ليكي كل الإجابات.



ايه هو سيرم فيتامين سي؟


فيتامين سي هو واحد من أفضل مضادات الأكسدة اللي بتحارب الشيخوخة وتضمن نضارة وشباب أطول لخلايا البشرة.


صحيح إن واقيات الشمس بتعزل البشرة عن الأشعة فوق البنفسجية الضارة، لكن هي بتحجب 55% بس من الأشعة الضارة. عشان كدا مهم اننا نستعمل مضادات للأكسدة، بالإضافة لواقي الشمس، لضمان أفضل حماية.


وبالرغم من إننا نقدر نحصل على فيتامين سي من خلال النظام الغذائي، لكن للأسف، كميات قليلة جدا هي اللي بتوصل لبشرتنا. عشان كدا مهم استخدامه المباشر على البشرة لتعزيز تكوين الكولاجين وتفتيح البشرة بشكل أسرع.


مين مفروض يستخدم سيرم فيتامين سي؟

سيرم فيتامين سي بيحمي البشرة من مشاكل كتير زي فرط التصبغات، التجاعيد، الخطوط التعبيرية، الجفاف، وعدم توحيد لون البشرة. لو كنتي بتعاني من أي مشكلة من دول، سيرم فيتامين سي هو الحل المناسب ليكي. ومع ذلك، الخبراء بينصحوا باستعمال فيتامين سي سيرم حتى لو مكانش عندك أي مشكلة من اللي ذكرناهم، ودا لأن له دور أساسي في مقاومة علامات الشيخوخة


عشان كدا مهم تفهمي سيرم فيتامين سي بيعمل إيه بالظبط للبشرة وإيه هي فوائده


إيه فوايد سيرم فيتامين سي للبشرة؟

سيرم فيتامين سي له تلات فوائد رئيسية للبشرة مينفعش تستغني عنهم


1 _ مضاد للأكسدة = بشرة شابة أكتر

كل يوم بشرتك بتتعرض فيه للشمس، فهي بتاخد خطوة أكبر تجاه الشيخوخة. لأن الأشعة فوق البنفسجية (أشعة الشمس الضارة بتتسبب في تكوين جزيئات اسمها "الشوارد الحرة" فوق سطح البشرة. الشوارد الحرة بتغيّر في بنية بروتين خلايا البشرة وتكسر الكولاجين.

فيتامين سي مهم في إنه يمنع الشيخوخة المبكرة لخلايا بشرتك وتحسين مظهر التجاعيد؛ عن طريق تحفيز تكوين الكولاجين وعزل خلايا بشرتك عن أشعة الشمس فوق البنفسجية.


2_ بيحفز تكوين الكولاجين = بشرة صافية أكتر

الكولاجين هو مادة بروتينية بتنتجها البشرة، مسؤولة عن شدها والحفاظ على شبابها. بالإضافة إن لها دور مهم في إنه يمنع التندّب ويسرّع شفاء الجروح، لو انتي بشرتك فيها آثار حبوب قديمة أو جروح، فيتامين سي سيرم مهم يكون جزء من روتينك .

3_ بيقلل تكوين الميلاتونين = بشرة موحدة اللون أكتر

سيدات كتير بتعاني من مشكلة تصبغات البشرة وعدم توحد لون البشرة. سيرم فيتامين سي له دور كبير في تقليل إنتاج الميلاتونين، وهي المادة المسؤولة عن تصبغ البشرة. عشان كدا فيتامين سي بيساعد في علاج البقع والكلف، بقع الشمس، آثار حب الشباب، وفرط التصبغ.

أفضل استخدام لأفضل نتيجة


1_ هل ممنوع نستخدم السيرم بالنهار؟


من أكبر التصورات المغلوطة هي إننا مينفعش نستخدم السيرم بالنهار عشان مايتأكسدش، ودا مش حقيقي. لأن صحيح إنتي تقدري تسعملي السيرم مرتين في اليوم، صباحا ومساءا، لكن كمان يفضل استعماله بالنهار لأنه بيشتغل على محاربة الشوارد الحرة اللي سبق واتكلمنا عنها، واللي بطبيعة الحال مش بتتكون في البشرة إلا بالنهار وبالتعرض المباشر للشمس.


عشان كدا بنطمنك، تقدري تستعملي السيرم الصبح من غير أي قلق، لكن أهم حاجة تحمي بشرتك بطبقة من واقي الشمس قبل الخروج بالنهار.


2_ إيه هي النسبة المثالية لفيتامين سي جوة السيرم؟

من أكبر الحجات اللي ممكن تربكك عند اختيار السيرم، هي نسبة فيتامين سي جواه. ناس كتير بتكون متصورة إن كل ما تزيد نسبة فيتامين سي، كل ما هتزيد فعالية المنتج. الحقيقة إن الحد المسموح بيه لنسبة فيتامين سي في السيرم، هي من 8 إلى 20%، لو زادت النسبة عن 20% دا هيعرض بشرتك للتهيج والالتهابات، ولو قلت عن 8% مش هيكون ليه أي فعالية.


بننصحك تبدأي دايماً بالتركيز الأقل علشان بشرتك تقدر تمتصه من غير ما تطور رد فعل تحسسي


3_ هل سيرم فيتامين سي فعلاً بيطلع حبوب للبشرة؟ وهل هو مناسب للبشرة المعرضة لتكوين الحبوب؟


الأبحاث الأخيرة كلها بتأكد إن سيرم فيتامين سي له تأثير علاجي على حب الشباب لأنه بيقلل الاحمرار الالتهابي (أحد عوامل ظهور حب الشباب). ولأنه بيستهدف الشوارد الحرة، اللي بتحفز البشرة لتكوين حبوب كرد فعل لمهاجمتها.


ومع ذلك، بعض البشرات ممكن تطور حبوب كرد فعل للسيرم، خصوصا البشرة المختلطة والحساسة. لو دا حصل معاكي، بنطمنك خالص، وبننصحك تستخدمي السيرم بشكل تدريجي، مرة واحدة بس في اليوم وبكميات قليلة، لغاية ما بشرتك تتعود عليه..


4_ ليه لون السيرم ممكن يتغير بعد فترة؟


سيرم فيتامين سي من أكتر المنتجات اللي تركيبتها حساسة جدا، ولازم يتم التعامل معاه بحرص. لأن تركيبته سريعة التأكسد، سواء بالتعرض للهوا أو لضوء الشمس.


صحيح إن صلاحية معظم منتجات سيرم فيتامين سي بتمتد حتى تلات سنوات، لكن كل الدكاترة بينصحوا إنك تتخلصي من السيرم لو فات عليه ست شهور من تاريخ فتح العبوة ولسة ماخلصتيهاش.


السبب في دا إن أي منتج في الدنيا بيكون له عمر افتراضي، بيبدأ من تاريخ فتح العبوة واستخدامه. ولأن السيرم منتج له تركيبة حساسة جدا، فالمواد الخام فيه بتبدأ تتفاعل مع بعض بالتدريج من أول لحظة فتحتي فيها المنتج.


لو بتستخدمي السيرم بتاعك على فترات متقطعة، وارد تلاحظي إن لونه أو ريحته بدأوا يتغيروا بعد كام شهر، السبب في دا إن السيرم منتج غير مُصمم إنه يتركن شهور على الرف من غير استعمال، لكن منتج مصمم للاستخدام اليومي لضمان السلامة والفعالية. 


عشان كدا بننصحك، لو هتشتري عبوة سيرم فيتامين سي، مهم تستعمليه بصفة يومية. بكدا هتضمني إن المنتج يتفاعل على بشرتك بدل ما يتفاعل جوة الإزازة. وهتتجنبي خطر تغير لونه أو ريحته لأن الازازة هتخلص منك خلال أسابيع قليلة.


5_ إزاي أتجنب تغير لون وريحة السيرم؟


احفظيه بطريقة صحيحة، في درج مقفول وفي مكان بعيد عن الحرارة أو الضوء المباشر، أو في الثلاجة وحاولي تستعمليه أول بأول.

6_ هل السيرم مناسب لمنطقة حول العينين؟

مفيش ضرر من وضع السيرم تحت العين(تجنبي تماما وضعه فوق الجفون). لكن مهم إنك تستخدمي كميات قليلة جدا منه للمنطقة دي نظرا لأنها رقيقة وحساسة أكتر من باقي الوجه.

لكن الخبراء بينصحوا بإننا نستعمل للمنطقة دي منتج تاني، يكون أخف في القوام وبيحتوي نسبة ترطيب أكتر.


7_ امتى مفروض ابدأ استعمل السيرم؟

 

دلوقتي حالاً. حتى لو سنك لسة صغير، مفيش ضرر من استعمال السيرم. لأن مهمته الأساسية هي تحفيز تكوين الكولاجين. ممكن تكون بشرتك خالية من التجاعيد دلوقتي، لكن قريب هتبدأ تجاعيدها في الظهور. خليكي فاكرة دايماً إن أفضل طريقة لعلاج التجاعيد، هيمنع ظهورها أصلا


8_ أتوقع النتيجة بعد قد ايه؟

السيرم من المنتجات اللي تأثيرها بيظهر على المدى الطويل. عشان كدا المداومة على استخدامه مهمة. تقدري تعتبري السيرم خدمة بتعمليها لبشرتك في العشرينات، عشان تحصدي نتيجتها في اواخر التلاتينات.

ومع ذلك، فلو هدفك من السيرم هو تقليل التصبغ وتوحيد لون البشرة، فكل الدراسات أثبتت إن أثره بيبدأ بعد من 4 إلى ست أسابيع من الاستخدام المستمر.

 


 







اترك تعليق

يرجى ملاحظة أنه يجب الموافقة على التعليقات قبل نشرها


الرجوع إلى الأعلى
Promo box

شخص ما قام بشراء

Product name

info info