البشرة الدهنية للمبتدئين: أهم مشاكلها وطرق علاجها

بشرتك طول الوقت بتلمع؟ بتعاني إن أي مكياج تحطيه بيسيح بسرعة ويختفي؟ بتحسي إن وشك عنده خط انتاج زيوت مستقل بذاته؟ 

لو عندك العلامات دي فانتي كدا من أصحاب البشرة الدهنية

البشرة الدهنية ممكن تكون مشكلة لناس كتير، خصوصاً إن الزيوت المفرطة اللي البشرة بتفرزها ممكن تسد المسام وتسبب ظهور الحبوب. ودا بيخلي مهمة الاعتناء ببشرتك تقيلة جدًا على قلبك.

حبينا نقولك إنك مش مضطرة تكرهي بشرتك، لأنك لو قدرتي تفهميها، هتعرفي قد إيه ممكن تكوني محظوظة إنك من أصحاب البشرة الدهنية.

هنا، هنحاول نساعدك ونعلمك خطوات بسيطة تقدري من خلالها تعتني ببشرتك.

لكن قبل ما نقولك الخطوات دي، محتاجين نشرح ليكي إيه هي البشرة الدهنية أساسًا؟ وإيه علاماتها؟

إيه هي البشرة الدهنية؟

البشرة الدهنية هي البشرة اللي عندها إفراز مفرط للزيوت عبر الغدد الدهنية. الزيوت دي بتكون طبقة دهنية بتغلف جلدك عشان تحميه من الجراثيم وتقلبات الجو والجفاف، غير إن الزيوت دي بيكون ليها دور كبير في ترطيب البشرة. 

معنى كدا إن الزيوت دي موجودة عشان تحميكي. لكن فين المشكلة؟ المشكلة بتبدأ لما الزيوت تتراكم بشكل أكتر من اللازم، فتتجمع في المسام وتقفلها، وتسبب ظهور الحبوب.

إزاي تعرفي إن بشرتك دهنية؟

لو بشرتك بتلمع أكتر من اللازم،  خصوصاً عند الأنف والدقن والجبهة. لو عندك مسام واسعة، لو بيظهر في وشك حوب بشكل متكرر. لو أي مكياج تحطيه بيسيح من على وشك بمعدل سريع. كل دي علامات تأكد إن بشرتك دهنية.

لكن هل دا معناه إنك في مشكلة؟ الحقيقة إن أصحاب البشرة الدهنية محظوظين لأنهم بشرتهم بتفضل شابة لمدة أطول من أي نوع بشرة تاني. خصوصاً إن معدل ظهور التجاعيد بيتأخر جداً.

لكن كل المزايا دي مش بتنفي إن الزيوت المفرطة ممكن تكون مأساة ليكي. 

والحل؟ تتخلصي من الزيوت تماماً وتخاطري بجفاف بشرتك؟ وللا تسيبي الزيوت دي وتخاطري برؤوس سوداء ومسام مقفولة وظهور متكرر للحبوب؟

الحل هو التوازن

لو إنتي من أصحاب البشرة الدهنية، فأكيد  وقعتي في فخ إنك تستخدمي غسول قوي يخلّص بشرتك من كل الزيوت اللي فيها. وأكيد كمان المرطبات فضلت لسنين برة قاموسك، من باب إنك مش ناقصة ترطيب، صح؟

الحقيقة إن التصرفين دول من أكتر الأخطاء الشائعة اللي بيقع فيها أصحاب البشرة الدهنية. لو بشرتك دهنية فانتي مش محتاجة تتخلصي من الزيوت، لكن محتاجة توازني نسبتها. بمعنى تاني، مش محتاجة تعاملي بشرتك إنها عدوتك، لكن محتاجة تصاحبيها.

إزاي توازني إفراز الزيوت في بشرتك الدهنية؟

1_ اختاري غسول مناسب

راقبي استجابة بشرتك للغسول بعد استعماله. بشرتك حاسة إيه؟ لو حسيتي إنها مشدودة او بقت جافة تماماً، وقفي استخدام الغسول دا فوراً.

في المقابل استبدليه بغسول يكون له درجة حموضة (بي إتش) من 5.5 لـ 6. لأن أي درجة حموضة عالية محتمل تسبب جفاف بشرتك لامتصاصها كل الزيوت. خليكي فاكرة، إنتي مش عايزة بشرة جافة، إنتي عايزة بشرة متوازنة. 

 ممكن كمان تستخدمي أنواع الغسول اللي بتحتوي الألوفيرا، لأنه من خصائصه إنه يمتص الدهون الزيادة من المسام، وطبيعته المرطبة بتدي ترطيب إضافي للبشرة وتجددها.

2_ ابعدي عن الكحول 

هتمر عليكي أوقات تزهقي من الزيوت المتراكمة طبقات فوق طبقات ومبوظة بشرتك، هتفكري في حل عملي وسريع يخلصك من الزيوت كلها. إيه أسرع من المنتجات اللي فيها كحول؟ 

لكن اللي انتي مش عارفاه إن بشرتك عندها آلية دفاع، كل ما تعرضيها لكحول يمتص كل زيوتها، كل ما هتفرز زيوت أكتر عشان تحافظ على ترطيبها. راجعي مكونات التونر بتاعك، لو لقيتي في مكوناته كحول بينشف، وقفيه لأن ضرره أكبر من نفعه

بشرتك صاحبتك، ماتبقيش عدوتها

 3_ الترطيب أهم حاجة في يومك

ممكن تتصوري إنك مش محتاجة ترطيب لبشرتك اللي مخزونها من الزيوت يكفي لترطيب دول بحالها. لكن دا اعتقاد خاطىء. 

الترطيب مهم عشان يخلق طبقة حماية للبشرة تعزلها عن البكتيريا والأتربة، وتحفظ ترطيبها الداخلي.

استخدمي كريمات ترطيب تكون مكوناتها خفيفة زي الجلسرين وحمض الهيالورونيك، لأنهم بيترسبوا جوة بشرتك لترطيب أعمق. ابعدي عن المستحضرات ذات الأساس الدهني، دوري على مستحضرات ذات أساس مائي.

 في الأساس بشرتك بتفرز دهون عشان تخلق لنفسها ترطيب ذاتي. عشان كدا خليكي أذكى منها، بدل ما تسحبي منها كل ترطيبها، اديها ترطيب خارجي يخدعها، فتقلل إفراز دهون.

 إزاي تعتني ببشرتك الدهنية؟

_ زي ما شرحنا ليكي، مهم تستخدمي غسول خالي من الزيوت صباحاً ومساءً. تجنبي الغسول اللي أساس قلوي، وابعدي عن أي غسول يسحب كل زيوت البشرة.

_ بعد كدا استعملي تونر خالي من الكحول، عشان ترجعي لبشرتك توازنها وتقفلي المسام.

_ متنسيش الترطيب، بمستحضرات ليها أساس مائي ومكونات خفيفة خالية من الزيوت.

_ مهم تعملي تقشير لبشرتك مرة كل أسبوع أو أسبوعين عشان تخلصيها من أي خلايا ميتة وأي زيوت متراكمة. لكن افتكري دايماً إن التقشير لو زاد عن حده المسموح (مرة كل أسبوع)، ممكن يسبب تهيّج بشرتك وتكوين حبوب.

 

اترك تعليقا

جميع التعليقات تراجع قبل نشرها