• شحن مجاني للطلبات التي تزيد عن 395 جنيه مصري.
  • ضمان الرضا 100٪ أو استعادة الأموال.

إيه الوقت اللي بتحتاجه مستحضرات العناية بالبشرة عشان تبدأي تلاحظي النتيجة؟

كل منتج  بتشتريه من منتجات العناية بالبشرة، بتشتري معاه أمل جديد محفوظ جوة إزازة صغيرة. يا ترى هيخلصك من حبوب الشباب؟ يا ترى هيعالج الخطوط التعبيرية؟ يا ترى هيوحد لون بشرتك؟

بتستعملي المنتج، وتراقبي بشرتك كل يوم في المراية، وكل يوم بيتراكم جواكي إحباط من إنك مش شايفة أي تغيير!

النصيحة الأولى لخبراء التجميل هي ضرورة الانتظام في استعمال منتجات البشرة، والمداومة عليها علشان نبدأ نلاحظ النتيجة. لكن امتى تتوقعي النتيجة؟  لحد إمتى بالظبط تصبري عالمنتج قبل ما تحكمي إذا كان مفيد، أو لازم تدوري على غيره؟ بمعنى تاني: إيه الوقت اللي بتحتاجه مستحضرات العناية بالبشرة، علشان تشتغل وتبدأي تشوفي أثرها؟

الإجابة المختصرة: على حسب !

مش بس الموضوع بيعتمد عالمواد الفعالة في كل منتج، لكن الأهم من كدا، إن النتيجة بتعتمد على متغيرات كتير لها علاقة بالبشرة نفسها. زي العمر، ولون البشرة ونوعها. بل وكمان الأمر بيعتمد على درجة حرارة الجو!

علشان نلاقي إجابة واضحة لسؤال زي دا، محتاجين الأول نفهم تركيب البشرة ونعرف خلاياها بتاخد وقت قد إيه علشان تتجدد

إيه هو تجدد خلايا البشرة

البشرة بتتكون من تلات طبقات رئيسية: البشرة (الطبقة الخارجية)، والأدمة/ والطبقة تحت جلدية.  

تجدد الخلايا بيحصل في الطبقة الخارجية من الجلد (البشرة) بصفة دورية. كل يوم بنبدل حوالي مليار خلية من بشرتنا. لكن دي النتيجة الخارجية لعملية أعقد بكتير، بتتبدل فيها كل خلايا بشرتنا على مدار أربع أسابيع.

الطبقة الخارجية لبشرة الإنسان متقسمة لأربع أقسام متميزة، مترتبين من الداخل للخارج ؛ الطبقة القاعدية والطبقة الحرشفية والطبقة الحبيبية والطبقة القرنية.

تبديل الخلايا بيحصل من جوة لبرة. بتتكون الخلايا في الطبقة القاعدية، وتبدأ تهاجر، تتحرك للخارج، وفي طريقها بتتخلص من خلايا البشرة السطحية وبتستبدلها بالخلايا الجديدة اللي اتكونت، في دورة بتستغرق من أربع إلى ست أسابيع، قبل ما تكرر نفسها تاني. علشان كدا القاعدة العامة إنك تستني على أي منتج 28 يوم علشان تبدأي تشوفي نتايجه.

إيه هي العوامل اللي بتأثر في عملية تجدد الخلايا؟

عوامل كتير متنوعة ومتباينة.  منها مثلاً:

1_ العمر

كل ما كان العمر أصغر، كل ما كان تجدد الخلايا أسرع. علشان كدا كل ما بنكبر كل ما الخلايا بتشيخ!.

2_لون البشرة

كل ما كانت البشرة لونها أغمق، كل ما كان معدل تجدد خلاياها أسرع.

3_ درجة الحرارة

تجدد خلايا البشرة بيكون أسرع في الصيف منه في الشتا

إزاي معدل تجدد الخلايا بيأثر على  المدة اللي بتحتاجها منتجات االعناية بالبشرة  علشان تشوفي نتيجتها؟

كقاعدة عامة، هتبدأي تلاحظي نتيجة بعد ما بشرتك تمر بدورة كاملة لتجدد خلاياها. دا بيحصل خلال حوالي 4 أسابيع.لكن لكل قاعدة استثناء، مش دايما هتلاقي النتيجة بسرعة، وكتير هتلاقي إنك أخدتي وقت أو أطول من المتوقع علشان تلاحظي النتيجة. دا بيعتمد على :

1_لو سنك كبير

2_بشرتك فاتحة

3_بدأتي روتينك في الشتا

بالإضافة لإن معدل تجدد الخلايا بيتأثر كمان بمشاكل البشرة. مثلاً: لو بتعاني من حب الشباب، معدل تجدد خلايا بشرتك هيكون أقل بكتير . علشان كدا خبراء الجلدية دايماً بينصحوا إنك تعالجي مشاكل بشرتك قبل ما تبدأي أي روتين عناية. (لو عاوزة تعرفي العلاقة بين حب الشباب ومعدل تجدد الخلايا، اقري المقالة دي).

لكن، زي ما العوامل الفردية بتأثر في معدل ظهور نتيجة روتينك. في عوامل تانية متعلقة بالمواد الفعالة في كل منتج. وكمان النتيجة اللي انتي بتستهدفيها.

إيه الوقت اللي بتحتاجه المواد الفعالة المختلفة عشان تبدأي تلاحظي النتيجة؟

حسب وظيفة كل منتج، حسب مشكلة البشرة، وحسب المواد الفعالة!

اسألي نفسك: عاوزة تعالجي إيه علشان تقدري تستخدمي المنتج الصح، وتتوقعي كمان النتيجة الصح.

1_عاوزة ترطيب: حمض الهاليورونيك (نتيجة فورية)

حمض الهاليورونيك مكون طبيعي بتنتجه البشرة من تلقاء نفسها. لما بنستخدمه بنساعد على إمداد البشرة بالمياه، اللازمة لترطيب طبقاتها ومنحها تكوين أكثر نعومة.

حمض الهاليورونيك بيكون له تأثير لحظي في الترطيب، بيظهر بمجرد الاستخدام، دقايق قليلة من استعماله وهتلاحظي الفرق!

 

2_ عاوزة تحاربي التجاعيد: سيراميد (من 15 دقيقة إلى 3 شهور)

صحيح عمرك ما هتقدري تتغلبي على التجاعيد باستخدام مرطب خارجي، لكن لو المرطب بيحتوي على مكون طبيعي بتنتجه البشرة، زي السيراميد، اللي بيشتغل على الطبقة الخارجية للبشرة، هيقدر يحسن مظهرها ويسد الفجوات بين خلايا البشرة، يرطب البشرة الجافة.

لأن السيراميد موجه بالأساس لسطح البشرة، نتيجته بتكون لحظية بمجرد استخدامه، من الدقايق الأولى، لحد مرور أسبوع. والنتيجة الأفضل بتبدأ بعد تلات شهور من الاستخدام المنتظم.

 

3_عاوزة مضادات الشيخوخة( الخطوط التعبيرية وفرط التصبغ): الرتينول وفيتامين سي (من شهرين إلى سنة)

في مواد فعالة كتير جدا تساعدك تتغلبي عالخطوط التعبيرية وفرط التصبغ.   كل مادة منهم بتحتاج أسابيع علشان أثرها يبان، وممكن تمتد لسنين!. علشان كدا مستحضرات المضادة للشيخوخة ممكن تبقى من أكتر المنتجات اللي محتاجة صبر وانتظار.

الرتينول: بيحتاج من تلات شهور إلى ست شهور علشان يبدأ يبان تأثيره على التجاعيد والخطوط التعبيرية.

فيتامين سي: في خلال أسبوعين بتبدأي تلاحظي نضارة بشرتك، لكنه بيحتاج من ست أسابيع لاتناشر أسبوع علشان يبان تأثيره على بشرتك.

4_ عاوزة تعالجي الوردية وفرط التصبغ: الكافيين (يومين)

الكافيين من المواد الفعالة اللي بتستخدم في علاج داء الوردية، عن طريق تضييق الأوعية الدموعية في البشرة.

بتبدأي تشوفي تحسن ملحوظ خلال يومين أو تلات أيام من استخدامه.

 

5_عاوزة تعالجي حب الشباب

في مواد فعالة كتير جدا مخصصة لعلاج حب الشباب، أهمهم هي أحماض ألفا وبيتا هيدروكسي. يليهم في الأهمية نيانسيمايد، وبنزويل البيروكسيد . كل مادة منهم بتاخد أسابيع علشان تبدأ تظهر نتيجة.

 _حمض ألفا هيدروكسي (حمض الجليوكوليك وحمض اللاكتيك)

من أربع أسابيع إلأى 12 أسبوع

_ أحماض بيتا هيدروكسي (حمض السالسيليك)

أول نتيجة بتظهر خلال أسبوعين من الاستخدام المنتظم، لكن النتيجة المثالية بتحتاج 12 أسبوع من الاستخادم المتكرر

_ بنزويل بيروكسايد

بيشتغل بشكل أساسي على قتل البكتريا المسببة للحبوب، مع معالجته لآثارها.

بشرتك هتبدأ تتحسن بعد تلات أسسابيع من الاستخدام. لكن النتيجة الأمثل بتكون خلال 12 أسبوع من الاستخدام.

 

_ النياسيناميد

بيقدر يحسن آثار حب الشباب خلال 8 أسابيع من الاستخدام.

ومع ذلك، ثبت إن له تأثيرات علاجية أخرى زي:

  • علاج فرط التصبغ : خلال 4 أسابيع
  • ترطيب البشرة: خلال 4 أسابيع
  • علاج احمرار البشرة: خلال أربع أسابيع
  • تقليل إفراز زيوت البشرة: من 2 إلى 6 أسابيع
  • علاج التجاعيد والخطوط التعبيرية: من 8 إلأى 12 أسبوع

 

الخلاصة:

  • معظم منتجات البشرة بتحتاج 4 أسابيع علشان تبدأ نتيجتها تظهر مع تجدد خلايا البشرة بشكل كامل.
  • لكن المنتجات المكافحة للخطوط التعبيرية والتجاعيد بتحتاج مدة تبدأ من 8 أسابيع حتى 12 أسبوع. دا لأن إنتاج الكولاجين في البشرة بيحتاج 3 شهور.
  • وأخيراً، المدة اللازمة لمنتجات البشرة عشان تظهر تأثير، بتعتمد على المادة الفعالة، وطيعة المشكلة المستهدفة، وطبيعة البشرة نفسها

 

اترك تعليق

يرجى ملاحظة أنه يجب الموافقة على التعليقات قبل نشرها


الرجوع إلى الأعلى
Promo box

شخص ما قام بشراء

Product name

info info