الاعتناء بالبشرة يعتبر مهمة  يومية، مهمة جسمك بيقم بيها بالنيابة عنك، من غير حتى ما تلاحظي.

لأن الجلد هو أكبر أعضاء الجسم، فبشرتنا بتحتاج مننا مجهود مضاعف للاعتناء بيها، علشان تؤدي وظيفتها وفي نفس الوقت يكون مظهرها مثالي. ولأن الاعتناء بالبشرة مهمة يومية، جسمك بيقوم بيها بالنيابة عنك، من خلال عملية اسمها " تجديد الخلايا".

عملية تجديد الخلايا بتأثر على كل حاجة تخص صحة بشرتك،  علشان كدا خبراء التجميل بدأوا ينتبهوا إنها ممكن في حد ذاتها تكون أسلوب علاجي لمشاكل كتير، من أهم المشاكل دي هي مشكلة حب الشباب.

 

هنا، هنشرحلك كل حاجة تخص عملية تجدد البشرة، وإيه العلاقة بينها وبين حب الشباب.

 

إيه هي عملية تجدد خلايا البشرة؟

تجدد خلايا البشرة هي عملية تكوين خلايا جديدة تحل محل الخلايا الموجودة بالفعل.هدفها تخليص الإنسان من الأضرار اللي بتصيب بشرته، سواء من الآشعة فوق البنفسجية أو الأتربة أو الجروح أو البكتريا والملوثات اللي في الجو.

خلال العملية، الخلايا الجديدة بتهاجر  من جوة الجسم لسطح البشرة، من أعمق طبقة من طبقات الجلد، لغاية ما توصل للطبقة الخارجية للبشرة.

مجرد ما توصل الخلايا الجديدة ، بنلاحظ إن البشرة بقت مقشرة وجافة نوعا ما، وبتتحول الخلايا القديمة لخلايا ميتة يطردها الجسم عن طريق المسام.

عادةً بتستغرق العملية دي  28يوم للإنسان البالغ، لكنها بتعتمد على عوامل كتير، زي السن ولون البشرة وطبيعتها والتغير الهرموني. عادة بشرة الأطفال بتتجدد بشكل أسرع من البالغين. علشان كدا بنلاقي دايما ان عندهم بشرة أنعم ومفهاش مشاكل.

 

إيه العلاقة بين عملية تجدد الخلايا، وظهور حب الشباب؟

عملية تجدد الخلايا مابتشتغلش بكامل كفائتها في البشرات اللي بتعاني من حب الشباب، أواللي  بشرتهم بطبيعتها معرضة لظهور حب الشباب.

أصحاب البشرة المعرضة لظهور حبوب بينتجوا خلايا ميتة بنسبة أكبر من البشرات الصحية، وبالتالي، عملية تجديد الخلايا بتكون أبطأ. السبب في دا، إن مسام بشرتهم بيتراكم داخلها خمس طبقات من الخلايا الميتة ضعف مسام البشرة. الظاهرة دي اسمها retention hyperkeratosis وبتنتج فيها البشرة خلايا ميتة بمعدل أكبر من اللي المسام تقدر تطرده.

كنتيجة، بتتراكم الخلايا الميتة داخل المسام، تخلق انسداد، وتختلط بإفرازات البشرة الزائدة وتخلق رؤوس سودا، أو تختلط بالبكتريا وتكون حب الشباب.

 

ازاي تسريع عملية تجديد الخلايا ممكن يحسن من مشكلة حب الشباب؟

خبراء البشرة اكتشفوا إن تسريع عملية تجديد الخلايا هو أحد الحلول الفعالة لمواجهة حب الشباب، لأ،ه بيعالج المشكلة من جذورها. ازاي؟ بإننا نمنع من البداية تراكم الخلايا داخل المسام.

أصحاب البشرة المعرضة لظهور حبوب الشباب بيعانوا من بطء عملية تجديد الخلايا بطبيعة الحال، علشان كدا من الضروري تدخل علاجي، يسرّع من عملية طرد الخلايا، بحيث ما تلحقش تتراكم داخل المسام وتتسبب في انسدادها.

ازاي تسرّعي عملية تجديد خلايا بشرتك؟

بإنك تتدخلي في العملية نفسها، سواء بوسائل خارجية تساعد البشرة إنها تقشّر، أو بمواد فعالة تقتل البكتريا وتمنع تراكم الخلايا الميتة.

1_ التقشير

نتيجة لضعف  قدرة البشرة المعرضة لظهور الحبوب على طر الخلايا الميتة، بنحتاج تدخل خارجي لتقشير البشرة. علشان كدا التقشير هو روتين لا غنى عنه لأصحاب البشرة المعرضة لحبوب الشباب، لأنه بيقدر يقلل تكوين الرؤوس السودا والحبوب، عن طريق الحفاظ على مسام البشرة نقية وخالية من أي انسداد.

ومع ذلك، خبراء التجميل بينصحوا إنك ماتعمليش تقشير لبشرتك أكتر من تلات مرات في الأسبوع. لأنه هيتسبب في تجريد بشرتك من الزيوت الطبيعية، ويتسبب في التهابات وتآكل للطبقة الخارجية لسطح البشرة (العباءة الحمضية).

دا على المدى الطويل هيخلق:

• حبوب شباب
• تجاعيد
• احمرار
• وكمان هيقلل من سرعة تجديد الخلايا

2_ الرتينول

بالإضافة لكونه مضاد للالتهاب، الرتينول هو أحد مشتقات فيتامين أ، بيمنع تكون حب الشباب عن طريق إنه يحفز المسام لطرد الخلايا الميتة اللي بتسبب انسدادها، وبالتالي تسريع لدورة تجديد الخلايا.

علشان كدا الرتينول بيعتبر أحد المواد الفعالة جدا في علاج حب الشباب، عن طريق إنه يمنع دورة تكونها من الأساس.

3_ أحماض ألفا هيدروكسي (حمض الجلايكوليك)

حمض الجلايكوليك هو مقشر، وطارد للخلايا الميتة.

ولأنه بيتكون من جزيئات صغيرة الحجم، له دور كبير في تسريع عملية تجديد الخلايا. لأ،ه بيقدر يخترق سطح البشرة ويكسر روابط الخلايا الميتة ويذيبها، وبكدا تقدر تخرج من المسام بشكل أسرع، يختصر رحلتك للحصول على بشرة صافية خالية من الحبوب.

 

4_ أحماض بيتا هيدروكسي

أحماض بيتا هيدروكسي هي مقشرات كيميائية، قابل للذوبان في الدهون، بالتالي بتقدر تشتغل عالبشرة الدهنية، وبتقدر تخترق المسام المسدودة نتيجة تراكم الزيوت داخلها.

حمض السالسيليك هو أحد أحماض بيتا هيدروكسي، معروف بقدرته على إذابة الزيوت المتجمعة داخل المسام، وتسريع عملية طرد الخلايا الميتة. بالإضافة لأنه بيقتل البكتريا اللي بتسبب ظهور حبوب الشباب.

5_ النياسيناميد            

على عكس أحماض ألفا وبيتا هيدروكسي، النياسيناميد هو أحد مشتقات فيتامين ب المتعادلة، علشان كدا تأثيره على البشرة بيكون ألطف.

بالإضافة لكونه مضاد للالتهاب، ومضاد للبكتريا، وأهميته في تقليل إنتاج زيوت البشرة المفرطة؛ النياسيناميد له دور فعال في تسريع عملية تجدد الخلايا، ع طريق تسريع عملية تحلل الخلايا الميتة وتنظيم إنتاج الكولاجين.